Zëvendësministri për Çështjet Evropiane, Asoc. Prof. Dr. Viktorija Trajkov, mori pjesë në punëtorinë "Prezantimi i draft-udhëzimeve me metodologjinë për përfshirjen e luftës kundër korrupsionit në kapituj/grupime", e cila u mbajt sot në Qeveri.
Në fjalën e saj, zëvendësministrja Trajkov theksoi rëndësinë e metodologjisë për përfshirjen e politikave antikorrupsion në procesin e negociatave me Bashkimin Evropian.
"Përmes nismave të tilla, ne dëshmojmë angazhimin tonë të vendosur ndaj transparencës, llogaridhënies dhe sundimit të ligjit si vlera themelore evropiane. Masat kundër korrupsionit nuk janë vetëm një detyrim në procesin e negociatave me Bashkimin Evropian, por edhe një nevojë thelbësore për përmirësimin e jetës së qytetarëve dhe rivendosjen e besimit në institucione", tha Trajkov.
Në punëtori u prezantuan udhëzime të draftuara që do të shërbejnë si bazë për punën e ardhshme të institucioneve, me theks të veçantë në bashkëpunimin ndërkufitar dhe harmonizimin me standardet evropiane. Të pranishmit diskutuan sfidat dhe mundësitë për zbatimin e metodologjisë së propozuar, si dhe rëndësinë e mbështetjes së vazhdueshme nga partnerët ndërkombëtarë.
Në këtë aktivitet morën pjesë përfaqësues nga sektori publik, shoqëria civile, organizatat ndërkombëtare dhe ekspertë, të cilët theksuan rëndësinë e luftës kundër korrupsionit si një bazë themelore për një proces të suksesshëm anëtarësimi në Bashkimin Evropian.
Zëvendësministri Trajkov shprehu mirënjohje për të gjithë pjesëmarrësit për kontributin e tyre dhe theksoi se Qeveria mbetet e përkushtuar për të krijuar një sistem të integruar dhe gjithëpërfshirës për luftimin e korrupsionit, i cili do të përparojë funksionimin demokratik të institucioneve dhe do të përshpejtojë rrugën evropiane të vendit.
