Shqyrtimi është një operacion formal dhe teknik i kryer nga Komisioni Evropian me qëllim përgatitjen për negociatat e anëtarësimit dhe përfaqëson një prezantim analitik të ligjit të BE-së dhe situatës në vendin kandidat në lidhje me të. Më konkretisht, si proces, ai synon, nga njëra anë, të njohë vendet kandidate me trashëgiminë ligjore të Bashkimit Evropian dhe kështu t'i përgatisë ato për negociata. Nga ana tjetër, qëllimi është që Komisioni dhe Shtetet Anëtare të mundësohen të vlerësojnë nivelin e përgatitjes së vendeve kandidate, të informohen rreth planeve të tyre të ardhshme dhe të marrin udhëzime paraprake mbi çështjet që do të jenë më të rëndësishme në negociata.
Shqyrtimi kryhet sipas kapitujve, përveç kapitujve: 34 "Institucionet" dhe 35 "Çështje të tjera", të cilët janë subjekt i negociatave në fazën përfundimtare të procesit të pranimit. Së pari, mbahen takime shpjeguese në të cilat përfaqësuesit e Komisionit prezantojnë në detaje ligjin e BE-së, të ndjekura nga takime dypalëshe me secilin vend. Pas përfundimit të këtyre dy fazave, Komisioni përgatit një raport shqyrtimi dhe ia paraqet Këshillit. Pas shqyrtimit të kapitullit përkatës, Këshilli vendos të hapë negociatat, me rekomandim nga Komisioni.
Pas vendimit të Këshillit Evropian të qershorit 2018 dhe ofrimit të një perspektive të qartë për fillimin e negociatave të pranimit në qershor 2019, Republika e Maqedonisë së Veriut filloi fazën e takimeve shpjeguese (kalendari) më 27 shtator 2018.
Me qëllim rritjen e transparencës në lidhje me këtë proces jashtëzakonisht të rëndësishëm, dhe për të informuar shoqërinë civile, shoqatat profesionale, komunitetin akademik dhe të biznesit, si dhe publikun e gjerë, po ndajmë prezantimet nga takimet e mbajtura deri më tani.