Sot, në Qeverinë e Republikës së Maqedonisë së Veriut, Zëvendëskryeministri i Parë dhe Ministri për Çështje Evropiane, Bekim Sali, realizoi një takim zyrtar me Ambasadorin e Republikës së Türkiye, Fatih Ulusoy.
Gjatë takimit u diskutua për bashkëpunimin dypalësh në disa fusha me interes të përbashkët, duke theksuar rolin e rëndësishëm të Republikës së Türkiye si anëtare e NATO-s dhe kontributin e saj në ruajtjen e paqes dhe stabilitetit rajonal dhe global, veçanërisht në aspektin e sigurisë.
Po ashtu, u trajtuan mundësitë për thellimin e bashkëpunimit ekonomik dhe rritjen e investimeve turke në vend, të cilat pritet të konkretizohen në periudhat e ardhshme.
Zëvendëskryeministri i Parë, Bekim Sali, shprehu mirënjohje ndaj Ambasadorit Ulusoy për mbështetjen e vazhdueshme dhe ndihmën institucionale të Republikës së Türkiye, duke vlerësuar marrëdhëniet e forta miqësore dhe vëllazërore mes dy vendeve.
