Ministri për Çështje Evropiane, Bekim Sali, mori pjesë në ngjarjen “Young Talent for Future Growth”, e organizuar në kuadër të programeve Young Energy Europe dhe Development Partnership Programme, ku u ndanë certifikata për pjesëmarrësit dhe çmime për projektet më të mira.
Në fjalën e tij, ministri Sali theksoi se zhvillimi i kapitalit njerëzor është thelbësor për transformimin ekonomik dhe përparimin e vendit drejt Bashkimit Evropian.
“Integrimi evropian nuk është vetëm një proces i harmonizimit të politikave, por një proces transformimi që varet nga njerëzit – nga njohuritë, aftësitë dhe gatishmëria e tyre për të udhëhequr ndryshime,” theksoi Sali.
Ai nënvizoi se iniciativa si Young Energy Europe kontribuojnë në ndërtimin e një ekonomie konkurruese dhe të qëndrueshme, duke zhvilluar profesionistë që do të udhëheqin tranzicionin e gjelbër dhe atë digjital.
Ministri përshëndeti gjithashtu programin e partneritetit zhvillimor me WUS, i cili krijon mundësi për arsimim, trajnim dhe punësim për të rinjtë, duke theksuar se investimi në dije dhe aftësi është kusht për zhvillim afatgjatë.
Sali theksoi se Qeveria, përmes Agjendës së Reformave dhe procesit të integrimit evropian, mbetet e përkushtuar për të krijuar kushte për zhvillimin dhe mbajtjen e talenteve në vend.
Në këtë ngjarje u ndanë certifikata për gjeneratën e re të pjesëmarrësve, si dhe çmime për projektet më të suksesshme për vitin 2026.
