Kapitulli 3.27 Mjedisi dhe ndryshimet klimatike është një përmbledhje politikash që synojnë mbrojtjen e mjedisit nga ndikime të ndryshme negative antropogjene, si dhe zvogëlimin e rreziqeve të ndryshimeve klimatike, shëndetit të njeriut dhe biodiversitetit. Nga vetë natyra e tij, kapitulli është horizontal dhe ka një rol të rëndësishëm në formësimin dhe zbatimin e politikave për energjinë dhe transportin. Ai mbulon fushat e mëposhtme: legjislacionin horizontal, cilësinë e ajrit, menaxhimin e mbeturinave, cilësinë e ujit, mbrojtjen e natyrës, kontrollin e ndotjes industriale, zhurmën, pylltarinë, kimikatet, ndryshimet klimatike dhe mbrojtjen civile.
Fokusi i politikës mjedisore të BE-së është Pakti i Gjelbër Evropian, i cili synon të prezantojë një ekonomi neutrale ndaj klimës në territorin e BE-së deri në vitin 2050, përmes zhvillimit të burimeve të pastra të energjisë dhe teknologjive të gjelbra, duke respektuar njëkohësisht parimet e zhvillimit të qëndrueshëm. Për realizimin e angazhimeve ambicioze politike të BE-së, do të përgatitet një propozim për Rregulloren për neutralitetin klimatik dhe një plan veprimi për realizimin e objektivave, duke përdorur mekanizmin e duhur financiar për Tranzicionin e Drejtë. Plani i veprimit i BE-së përfshin Axhendën e Gjelbër për Ballkanin Perëndimor, e cila do të zhvillohet dhe promovohet në tranzicionin e ardhshëm në të gjitha vendet e rajonit, dhe kështu përshtatja e politikave kombëtare me politikat dhe dinamikat e BE-së në këtë fushë do të jetë e pashmangshme.