Маврово, 10 февруари 2025 година – Министерот за европски прашања, Орхан Муртезани, денеска го отвори настанот „Заштита на јавните финансиски интереси на инфраструктурни проекти финансирани од ЕУ“, кој се одржува во Маврово во организација на УНОПС.

Во своето обраќање, министерот ја нагласи клучната улога на довербата во институциите, владеењето на правото и одговорното управување со јавните финансии.

„Довербата не се дава, таа мора да се стекне и да се заштити преку транспарентност, отчетност и непоколеблив интегритет. Затоа сме денес овде,“ истакна Муртезани.

Тој ја потенцираше важноста на соработката меѓу институциите за да се осигури дека инфраструктурните проекти финансирани од ЕУ се реализираат со највисоки стандарди на интегритет.

„Со одобрувањето на нашата реформска агенда, Северна Македонија доби пристап до над 750 милиони евра преку Инструментот за реформи и раст на ЕУ – значајна можност, која истовремено бара строг финансиски надзор. Европската комисија јасно стави до знаење: напредокот во борбата против корупцијата не е опција – тоа е неопходност,“ нагласи министерот.

Министерот подвлече дека инфраструктурните проекти се од витално значење за развојот на државата, но без силни антикорупциски механизми, тие ризикуваат да станат симбол на изгубен потенцијал.

Во овој контекст, Министерството за европски прашања останува посветено на зајакнување на институционалната соработка, финансискиот надзор и пристапот со нулта толеранција кон корупцијата.

„Нашиот пат кон Европската Унија е, пред сè, пат на доверба. Изборите што ги правиме денес ќе ја дефинираат нашата иднина. Мораме да се погрижиме дека нашето наследство е кредибилитет, отпорност и добро владеење,“ заклучи министерот.

На настанот присуствуваат претставници на Владата, Европската Унија, домашните институции, како и меѓународни експерти од областа на финансискиот надзор и управувањето со јавните средства.

Во продолжение е интегралниот текст од обраќањето:

Почитуван потпретседател на Владата, почитувани претставници на Европската Унија и институции на Северна Македонија, почитувани експерти и гости,

Во сржта на секое демократско општество лежи ДОВЕРБАТА - довербата во институциите, во владеењето на правото, во одговорното управување со јавните финансии. Довербата не се дава, таа мора да се стекне и да се заштити преку транспарентност, отчетност и непоколеблив интегритет. Затоа сме денес овде.

Оваа работилница е повеќе од размена на експертиза, таа е потврда на нашата колективна одговорност да осигуриме јавните средства да служат за доброто на јавноста. Ја изразувам мојата благодарност до УНОПС, чија програма „Знаење за реформска акција во Западен Балкан“ имаше значајна улога во зајакнувањето на владеењето и регионалната соработка.

Со одобрувањето на нашата реформска агенда, Северна Македонија доби пристап до над 750 милиони евра преку Инструментот за реформи и раст на ЕУ - значајна можност, која истовремено бара строг финансиски надзор. Европската комисија јасно стави до знаење: напредокот во борбата против корупцијата не е опција - тоа е неопходност. Инфраструктурните проекти, кои се од витално значење за нашиот развој, се особено ранливи. Без силни антикорупциски заштитни мерки, тие ризикуваат да станат симбол на изгубен потенцијал, наместо двигатели на прогресот.

Министерството за европски прашања е посветено да осигури највисоките стандарди за управување и одговорност да ги водат сите реформски напори. Зајакната меѓуинституционална соработка, зајакнат финансиски надзор и пристап со нулта толеранција кон корупцијата ќе бидат клучни. Но, реформата не се однесува само на спроведување, туку бара промена на начинот на размислување, каде што не само што се очекува, туку и се бара интегритет.

Оваа работилница е можност да размениме најдобри практики и да ја потврдиме  нашата посветеност за заштита на јавните финансии. Ниту една институција не е без надзор, ниту еден поединец не е над одговорноста.

Дами и господа,

Нашиот пат кон Европската Унија е, пред сè, пат на доверба. Изборите што ги правиме денес ќе ја дефинираат нашата иднина. Мораме да се погрижиме дека нашето наследство е кредибилитет, отпорност и добро владеење.

Уверен сум дека претстојните дискусии ќе ја зајакнат нашата решителност да ги заштитиме јавните финансиски интереси. Уште еднаш, им благодарам на УНОПС за непоколебливата поддршка и на сите вас за посветеноста. Оваа работилница нека биде уште еден чекор кон посилни институции, подлабоки реформи и европска Северна Македонија.

Ви благодарам.