Денеска во Клубот на пратениците се одржа презентација на Процедуралниот прирачник за терминологија. На презентацијата на прирачникот воведно обраќање имаше Државниот Секретар на Секретаријатот за европски прашања г-ѓа Ана Блажеска.

Во своето обраќање г-ѓа Блажеска се осврна на содржината,намената како и придобивките од Процедуралниот прирачник за терминологија.
Процедуралниот прирачник за терминологијата ja опфаќа терминологијата во контекст на подготовката на националната верзија на acquis (правото на Европската унија) управувани од страна на Секретаријатот за европски прашања, што е од големо значење за обезбедување на конзистентни преводи на законодавството и изработка на сигурен извор за правата и обврските на нашите граѓани.

Истиот е наменет за преведувачи, ревизори, терминолози, како и за сите оние кои се заинтересирани за терминолошката работа во целина. Прирачникот претставува збир на упатства за превод на терминологијата во Секторот за подготовка на националната верзија на acquis во рамките на Секретаријатот за европски прашања, истакна Блажеска.

Прирачникот ги содржи основните принципи на терминологијата проследена со детален опис на работа и активности, улогата на учесниците и на нивните обврски во преводот на терминологијата, изработка на дефиниции, практичните аспекти на управување со терминологијата како и прашања во врска со обезбедување на квалитет и контрола на квалитетот.

Овој прирачник претставува многу корисна алатка која може да се користи од страна на сите засегнати страни во процесот на креирање на национална верзија на acquis communautaire (правото на Европската унија) и обезбедување на висок квалитет на истата.