Во пресрет на есенскиот Извештај од Европската комисија, а во рамки на ЕУ Агендата 2014 на Секретаријатот за европски прашања, заменик претседателот на Владата на Република Македонија задолжен за европски прашања д-р Фатмир Бесими, со претставници од секторите задолжени за ИПА и евроинтеграции, оствари работна посета на Министерството за локална самоуправа каде се сретна со министерот Лирим Шабани и претставници од ова министерство.

На средбата се разговараше за реализацијата на активностите кои се предвидени за поддршка на процесот на децентрализација, со посебен акцент по однос на програмите за развој на планските региони, предвидени во Националната програма за усвојување на правото на Европската Унија (НПАА). При тоа беше констатирано дека е потребно да се зајакнат напорите за натамошно унапредување на фискалната децентрализација на општините како и активностите за балансиран регионален развој.

На средбата се разговараше и за искористеноста на средствата кои стојат на располагање преку Инструментот за предпристапна помош – ИПА, а кои се клучни за реализација на реформите во локалната самоуправа. Вкупниот број на проектни предлози од ИПА програмите за прекугранична соработка одобрени за финансирање во Република Македонија изнесува 193 проекти, во периодот од 2007-2013 година, во вкупен износ од околу 24 милиони евра. Во рамките на Компонента 1 - ТАИБ, подготвени се вкупно 3 проекти во износ од околу 10 милиони евра. Беа дискутирани и иницијативи за подобрување на искористеноста на ИПА средствата од страна на Министерството, планските региони и единиците на локална самоуправа, со цел да не дојде до нивно губење, како и иницијативи во насока на подигнување на видливоста на процесот.

Бесими истакна дека искористувањето на европските фондови за проектите од Министерството за локална самоуправа е значајно за подобрување на животот на граѓаните во Република Македонија и за приближување на земјата кон Европската унија, преку вложување во социо-економскиот развој, усогласување на законодавството со Европското, како и регионален развој.

Серијата работни посети “ЕУ - ИПА Институционална Координација" на Вицепремиерот Бесими ќе продолжи и со останатите институции корисници на ИПА фондови и имплементатори на НПАА, со цел непосредно информирање за сите аспекти од користењето на ИПА, имајќи ги предвид прашањата на програмирање, техничко спроведување, мониторинг, известување, исполнување на предуслови за успешно спроведување на проектите/програмите, како и аспекти на системот на управување, институционален и административен капацитет, почитување на процедурите за користење на овие средства, функционирање на координативни механизми, како и разгледување на статусот на реализација на активностите предвидени во НПАА.